Riikaantikvára birra

Riikaantikvára lea Dálkkádat- ja birasdepartemeantta vuollásaš direktoráhtta, ja mii leat departemeantta ráđđeaddit buot áššiin mat gusket kulturmuittuide ja kulturbirrasiidda. Riikaantikvára lea bajitdási kulturmuitoeiseváldi ja das lea ovddasvástádus bidjat johtui nationála kulturmuitopolitihka.  Mis lea fágalaš ovddasvástádus suohkaniidda, fylkkagielddaide, Sámediggái, Svalbárda áššeolbmái ja kulturmuitosuorggi hálddašanmuseaide.

Mis lea mearridanváldi ráfáiduhttimiidda, ja mii leat váiddaásahus mearrádusaide mat leat dahkkon kulturmuitosuorggi regionála kulturmuitohálddašeamis.  Riikaantikváras lea cealkinváldi plánaáššiin.

Kulturmuittuid hálddašeapmi

Kulturmuitohálddašeamis lea fylkkagielddain váldonjuolggaduslaččat hálddašanovddasvástádus ráfáiduhtton kulturmuittuide.  Dat mearkkaša ahte fylkkagielddat leat rievttes eiseválddit addit sierralobiid kulturmuitolágas, ja sis lea ovddasvástádus vuhtiiváldit kulturmuittuid areálaplánemis.  Riikaantikváras lea hálddašanovddasvástádus muhtun kulturmuittuide, nugo gaskaáiggegávpogiidda Oslo, Tønsberg, Bergen ja Troandin. Kulturmuittuide maidda Riikaantikváras lea hálddašanovddasvástádus čužžot sierra listtus.

Riikaantikváras lea ovddasvástádus hálddašit kulturmuitoárvvuid mat gullet girkuide, ja erenoamáš ovddasvástádus stáhpegirkuide.

Mii doaimmahit strategiijaovdánahttima ja mis lea ovddasvástádus erenoamáš vuoruhansurggiide mat leat kulturmuitosuorggis.  Min doaimmaide gullá maiddai bagadallan, gelbbolašvuođalokten ja bargat guovddáš dieđuiguin mat gullet kulturmuittuide almmolaš hálddašeamis.

Riikkaidgaskasaš ovttasbargu

Mii ovttasbargat maiddai riikkaidgaskasažžat EEO- ruđaid, dutkanprošeavttaid ja máilmmiárbbi oktavuođain.  2022 rádjai lea Norga mielde UNESCO máilmmiárbelávdegottis. Riikaantikvára jođiha barggu Norgga áirrasgotti lávdegoddái, lagas ovttasbargguin Dálkkádat- ja birasdepartemeanttain ja Birasdirektoráhtain.