Informasjonsdeling på plakaten

Infoskjermløysinga ved kulturhuset Blå Grotte i Fredrikstad viser korleis ein kan løyse dagens behov for informasjonsdeling utan å gå på kompromiss med kulturminnet. Ved å tilpasse materialbruk, storleik og utforming til dei originale plakatskåpa, har ein funne ei løysing som både er praktisk og estetisk. Dette gir bygningen ei funksjonell oppgradering som harmonerer med det arkitektoniske særpreget og kulturminneverdiane.

Verdensspeilet, Blå Grotte og Speilet utgjer eit samanhengande kulturmiljø med tre  kinobygg i Fredrikstad. Dei vart oppført i ulike periodar: Verdensspeilet i 1912, teikna av arkitekt Martin Andreassen, Blå Grotte i 1938, teikna av Arthur Brynhildsen, og tilbygget Speilet med foajé og liten sal i 1967, teikna av Axel Fronth.

Blå Grotte vart bygd på tomta der den gamle kinoen «National» stod, og fekk eit formsterkt funksjonalistisk uttrykk med dekorativ bruk av tegl i fasaden. Verdensspeilet er i dag kafé, medan Blå Grotte og Speilet har vorte omgjort til kulturscener. I 2002 vart det etablert ein ny, moderne kino vegg i vegg som ein del av rådhuset.

Heile bygningen vart modernisert innvendig av Griff Arkitektur og gjenopna som kulturhus i april 2007. Blå Grotte blir i dag brukt som musikk-, revy- og teaterscene, i tillegg til utleige til selskap.

Utanfor den tidlegare kinoen stod det plakatskåp som vart brukte til å dele informasjon om førestillingane. Det var ønskje om ei meir praktisk løysing som kunne redusere papirbruk og samstundes gi høve til å vise informasjon i større format.

Løysinga vart å integrere digitale informasjonsskjermar i plakatskåp. Dei gamle skåpa hadde ei inndeling som ikkje passa for skjermar, og det vart difor spesialbygd nye tredelte skåp i koparbelagt rustfritt stål. Utforminga og materialbruken er mest mogleg lik dei originale, og den ytre storleiken måtte vere identisk for å unngå inngrep i sokkelmuren og endre det arkitektoniske uttrykket.

LED-skjermane vart valt ut spesielt for å passe det formatet som fekk plass i dei nye skåpa. Skjermane er eigentleg utvikla for innandørs bruk, men dei spesialtilpassa låsbare skåpa gjer at dei no toler å stå utandørs. Skjermane har lågt energiforbruk og lang levetid, noko som bidreg til å gjere løysinga meir berekraftig.

Infoskjermløysinga ved Blå Grotte viser korleis ein kan dekke moderne behov for informasjonsdeling på ein måte som både er estetisk og tek vare på det historiske uttrykket til bygningen.

• Digitale løysingar kan integrerast i historiske element utan å endre det arkitektoniske uttrykket.
• Materialval og dimensjonar må tilpassast originalen for å bevare historisk uttrykk.
• Spesialtilpassa skåp kan gjera det mogleg å bruke innandørsteknologi utandørs.
• Energiforbruk og levetid bør vurderast for å sikre berekraftige løysingar.