No går startskotet for Statens arkitekturpris 2026!

Temaet for prisen i 2026 er bustadprosjekt som har lagt særleg vekt på varsam ressursbruk gjennom ombruk, gjenbruk og sambruk. 

– Statens arkitekturpris skal vise fram førebilete som hever kvaliteten i by- og bomiljø. Regjeringas ambisjon er at vi saman forvaltar og utviklar arkitektur med varierte nabolag, varsom ressursbruk, vakre omgjevnader og varige kvalitetar. Med denne prisen ønskjer vi å løfte fram løysingar som merker seg ut med god arkitektur, stadeigen byggeskikk, og berekraftige og varige løysingar, seier kommunal- og distriktsminister Bjørnar Skjæran.

Les meir om saka på regjeringa sine nettsider. 

– Vi er glade for at det er sterkt fokus på ombruk og gjenbruk av eksisterande bygg for årets pris. Fortsatt bruk av gamle, og ikkje fullt så gamle, bygningar er den beste forma for vern av kulturminne og kulturmiljø, seier riksantikvar Hanna Geiran. 

Målet med Statens arkitekturpris er å fremme prosjekt som styrker by- og bumiljø med god arkitektur og varige, berekraftige kvalitetar.  

Departementet ønskjer å løfte fram arkitektur som gir varierte nabolag, varsam ressursbruk, vakre omgjevnader og varige kvalitetar. 

– Det blir spanande å sjå prosjekta som kjem inn, og vi håpar sjølvsagt at det kjem mange nominasjonar der ein har teke vare på stadeigen arkitektur gjennom ombruk av bygg.  

– Det er fint å sjå at kulturminne og kulturmiljø blir løfta fram som ein del av løysinga for varsam ressursbruk, seier jurymedlem frå Riksantikvaren, Anette Morvik Robberstad.

Nominasjon, vurdering og frist 

Det er mogleg å nominere både store og små prosjekt frå heile landet, uavhengig av storleik og lokalisering – frå byar, tettstader og distriktsområde. Både reine bustadprosjekt og prosjekt der bustader er ein del av føremålet, kan nominerast.