Næring og industri
Dei mangfaldige næringane våre
Mangfaldet av næring og industri har forma lokalsamfunn over heile landet. Spor etter denne utviklinga gir identitet, særpreg og ressursar for framtida.
Næringane våre har skapt kulturmiljø som er viktige for identiteten til eit lokalsamfunn. Det har vore små hjørnesteinsbedrifter og sentrale nav, ofte som landemerke på grunn av plassering, storleik og arkitektur. Kulturmiljø som bryggeri, meieri, sykkelfabrikkar og bakgårdsindustri gir variasjon og oppleving av fleire tidsperiodar. Dei har stor sosialhistorisk verdi, knytt til ulike kulturar og livsgrunnlag, og kan spegle eit breitt mangfald i historia.
Samtidig har dei stor bruks- og ombruksverdi. Bevaring og ny bruk gir ressursar til berekraftig verdiskaping og reduserer klimagassutslepp. Dette deltemaet styrkjer kunnskapen om kva kulturmiljø som er verdifulle, og kva verdiar dei representerer. Slik kunnskap er avgjerande for å ta vare på særpreg gjennom bevaring og ny bruk.
Når endringstakten er høg og arealpresset stort, kan kulturmiljø raskt gå tapt. Deltemaet rettar søkjelyset mot dei mest sårbare – anten fordi presset er sterkt eller verdiane lite kjende. Målet er å sikre at mangfaldet i nærings- og industrimiljø blir verdsett og kjem til nytte i lokalsamfunn gjennom bevaring, verdiskaping og berekraftig bruk.
Prioriteringer
Riksantikvaren har ei rekke prioriterte aktivitetar knytt til industri og næring. Her er det mange kulturminne og kulturmiljø som har eit stort potensial, og som kan få tilskot til verdiskaping. For dei mangfaldige næringane våre gjeld dette spesielt byindustri og særeigen småindustri.
I deltemaet «Dei mangfaldige næringane våre» blir to område prioriterte
- byindustri
- særeigen småindustri
Byindustri
Byindustri omfattar kulturmiljø knytte til næring og industri i byar. Ho er forma av lokale ressursar, historiske næringsvegar og behov som har oppstått med byutviklinga. Byane tiltrekte seg folk og arbeidsplassar, og med vekst kom behov for meir infrastruktur og fleire varer. Byindustri ligg ofte i område med blanda arealbruk og er omgitt av bygningar med ulike funksjonar.
Kulturmiljø knytte til byindustri varierer frå små bygningar til store fabrikkanlegg. Ein del av historia ligg også under bakken, i kulturlaget. Byindustri omfattar gjerne produksjon med moderat arealbehov, som konfeksjon, næringsmiddel og grafikk. Ho er ofte tilpassa busetnadsmønsteret, til dømes kvartalsstruktur med murgardar, og har begrensa moglegheit for utviding.
I byar er arealpresset stort og utviklingstakten høg. Derfor er industribygningar med godt bevart eksteriør og interiør sjeldne. Mange er ombygde eller har fått ny bruk, men kan framleis vere viktige spor i byens historie og eigenart. Det prioriterte området fokuserer på industri som er særleg sårbar på grunn av høgt utbyggingspress.
Særeigen småindustri
Småindustri er industri i liten skala med få tilsette. Småindustri omfattar ulike næringar som har vore viktige for mange i mange år. Det kan vere knytt til ressursutnytting, som foredling av råvarer frå primærnæringa – til dømes slakteri, ysteri eller trandamperi. Ho kan også dreie seg om verkstader for reparasjon og tilverking av verktøy og utstyr til annan næringsverksemd.
Med særeigen småindustri meiner vi dei unike og mindre utbreidde verksemdene som sprang ut frå nød, nytte og skaparkraft. Det kan vere mangesysleri som binæring eller nisjeindustri tilpassa spesielle behov, som fabrikken som produserte laminariastiftar (tongspikar). Særeigen småindustri kan også vere knytt til visse folkegrupper og ha stor kulturell verdi, til dømes ved foredling av produkt frå samisk reindrift.
Særeigen småindustri representerer eit mangfald av handverksfag og arenaer for utøving av praktisk kunnskap. Det prioriterte området omfattar småindustriar som ofte er lite kjende og derfor særleg sårbare.
Treng du inspirasjon?
Du finner eksempel på gode prosjekt i Riksantikvaren si eksempelsamling. Fleire av desse er relevante for kulturmiljø i næring og industri, mellom anna Carls, Trevarefabrikken i Henningsvær og Grendehuset på Torshov.
