Nyheter

Ekstremvêret Amy truar 75 viktige område med mange kulturminne

– Ekstremvêret kan treffe kulturarven vår midtskips. Liv og helse er alltid viktigast, men Agder, Vestfold og Telemark er også område med rike kulturmiljø, seier riksantikvar Hanna Geiran.

Publisert: 3. oktober 2025

Ventar på ekstremvêret Amy: Ny-Hellesund.
Stille før stormen: Det freda kulturmiljøet Ny-Hellesund ventar på ekstremvêret Amy. Foto: Trond A. Isaksen, Riksantikvaren.

Faren for skadar og tap av kulturminne er stor, og vi kan stå i fare for å miste viktige kulturminne, kulturmiljø og landskap.

Fylka Agder, Telemark og Vestfold har til saman 75 område med kulturmiljø av nasjonal interesse som no er trua av raudt eller oransje farevarsel. I tillegg har desse fylka svært mange freda enkeltbygningar og fartøy. Også kulturminne under bakken kan bli ramma av store regnmassar og flaumskadar.

–  Både dei vakre kystbyane, innlandsområda og verneflåten kan bli ramma av stormen, seier riksantikvar HannaGeiran.

–  Sjekk takrenna og grøftene, og sørg for å sikre båten ekstra godt.

– Byane er vi spesielt bekymra for, i og med at flaumvatn kan ta nye og overraskande vegar over harde flater og utanom blokkerte eller for små røyr, seier Geiran.

I Agder ligg det freda kulturmiljøet Ny-Hellesund midt i stormen, rett utanfor Kristiansand, men fylket har også ikkje mindre enn sju byar med kulturmiljø av nasjonal interesse innanfor sona for raudt farevarsel, og tre til i oransje sone.

Vestfold fylke ser ut til å bli hardt ramma av vêret, og både i Larvik, Sandefjord, Tønsberg, Horten og Åsgårdstrand er det fleire verdifulle byområde på Riksantikvarens liste, inkludert mellomalderbyen i Tønsberg.

Telemark har heile åtte viktige kulturmiljø i raud sone i Bamble og Porsgrunn kommune, og heile 12 i oransje sone, frå både kyst og innland. Dette omfattar også verdsarven på Notodden. Enkelte av desse områda ligg også tett opp til grensa mellom raudt og oransje farevarsel.

Ekstremvêr krev beredskap og risikoanalysar

For å ta godt vare på kulturminna under slike hendingar er det viktig at kommunane har gode risikoanalysar og gode beredskapsplanar.

– Det er for seint å lage planen når uvêret hender, men stadig fleire kommunar har jobba godt med dette, sier Geiran.

Risikoreduserande tiltak må vere ein del av den løpande planlegginga, og det må også gjelde kulturminne.

I 2025 fekk 18 kommunar tilskot frå Riksantikvaren for å lage risiko- og sårbarheitsanalysar for kulturmiljøa sine, og Horten kommune var ein av desse.

– Vi seier at omsynet til kulturmiljø bør vere ein integrert del av beredskapsarbeidet i kommunane og fylkeskommunane, seier Geiran.

– No håpar vi at ikkje beredskapen blir sett på prøve i denne omgangen.

Sjå kulturmiljøa som kan bli ramma

I Agder gjeld raudt farevarsel for desse kulturmiljøa:

  • Det freda kulturmiljøet Ny-Hellesund, utanfor Kristiansand
  • Kristiansand: Kvadraturen, Murbyen, Posebyen, Solbygg
  • Arendal: Tyholmen og Pollen
  • Grimstad sentrum
  • Lillesand Sentrum
  • Tvedestrand Sentrum
  • Risør Sentrum

I tillegg har Agder desse viktige kulturmiljøa i oransje sone for stormen: 

  • Mandal Sentrum
  • Farsund Sentrum
  • Flekkefjord Sentrum

I Vestfold jobbar Riksantikvaren og fylkeskommunen med å utpeike ei ny oversikt over viktige kulturmiljø. Denne lista er førebels, og visar at Vestfold har ein rik kulturarv:

  • Holmestrand kommune: Eidsfoss, Vålegrenda, Kirkegaten og Nordre Kleiv
  • Horten kommune: Karljohansvern, Keisemark, Storgata, Borre, Åsgårdstrand
  • Tønsberg kommune: Jarnalderbygd med setre rundt Revovannet, Oseberghaugen og Slagendalen, Jarlsberg hovedgård, Slottsfjellet og Tønsberg middelalderby, Nordbyen, Fjerdingen, Gamle Tønsberg sentrum, Haugarlia
  • Færder kommune: Færder nasjonalpark
  • Sandefjord kommune: Høyjord, Håøya og Sundåsen, Gokstad, Nybyen, Murbyen i Sandefjord sentrum, Rukla, Bjerggata og Preståsen, Hystadveien, Parken, Jåberg, Istrehågan, Marumdalen, Haugen og Vestad
  • Larvik kommune: Bøkeskogen, Hammerdalen, Langestrand, Storgaten, Steinane og Bøkkerfjellet, Herregården og Tollerodden, Torstrand,  Vikingstidsbyen Kaupang, Kjerringvik, Ula, Brunlanes, Stavern, Nevlunghavn, Mølen, Oddane fort

I Telemark er ein heil rekke områder råka av farevarslet:

I raud sone ligg:

  • Bamble kommune: Korsalen kalksteinsbrudd, Langesund by, Stathelle
  • Kragerø kommune: sentrum med Øya, Stråholmen
  • Porsgrunn: Vallermyrene leir, Brevik og Verksteds-, brynesteins- og porselensområdet

I oransje sone ligg:

  • Nome kommune: Ulefoss og Vrangfoss og Eidsfoss sluser
  • Notodden kommune: Heddal, Lifjell – stølsområde og skogdrift, Svelgfoss kraftstasjon, og Notodden sentrum med Grønnebyen, Villamoen og Jugendbyen
  • Skien: Gjerpensdalen og Fossum, Skotfoss, Skien sentrum og Snipetorp

Finn kulturmiljø og kulturminne

Sjå www.kulturminnesok.no for å finne kulturminne og kulturmiljø i ditt område.

Pressevakt Riksantikvaren

Ikke send sms, telefonen viderekobles.
Telefonen er betjent i vanlig kontortid.
Tel: 404 65 153