Sjå oversikta: 164 søknader om kyrkjetilskot

I den andre søknadsrunden til kyrkjebevaringsfondet kom det inn 164 søknader frå heile landet.

Det er ein auke frå dei 103 søknadene som vart mottekne i den første runden i august.

21 av søknadene er til den nye kompetanseordninga, som er retta mot tiltak som skal byggja kompetanse og kunnskap for handverkarar og rådgivarar.

– Auken i søknader er veldig gledeleg. Det viser at behovet er stort der ute. Dette merkar me også engasjerer folk rundt i Kyrkje-Noreg, seier barne- og familieminister Kjersti Toppe.

I den første runden med utlysing tidlegare i år kom det ingen søknader frå Oslo og Nordland. No har det komme fleire frå begge fylka.

– Det er veldig bra at det no er komme inn søknader frå heile landet, seier Toppe.

– Behovet er stort

Ramma på tildelinga på 2025 er på rundt 300 millionar kroner. Av desse er om lag 100 millionar allereie bunde opp gjennom tilsegn som vart gjort førre runde.

Tildelinga vil bli gjennomført i løpet av vinteren 2025, under forusetning av Stortingets godkjenning av budsjettforslaget.

– Det nye sekretariatet i Trondheim jobbar no på spreng med å vurdera alle søknadene. Me ser at det er mange spennande planar i søkjarbunken, seier leiar av kyrkjebevaringsfondet, Oddbjørn Eide.

Han seier sekretariatet forventar endå fleire søknader til neste runde i 2025.

– Me har gjennomført eitt av to søkjarkurs for kyrkjeeigarar no i haust, og det har nok bidrege til auken. Me forventar ein auke når begge kursa er haldne, seier Eide.

Det er i alt fire tilskotsordningar som kyrkjene kunne søkja på for 2025. Det er to typar forprosjekt, hovudprosjekt og den nye kompetanseordninga.

Allsidig søkjarmasse

Eide synest det er spesielt gledeleg at det kom fleire søknader til nettopp kompetanseordninga. Han kan fortelja om ein allsidig søkjarmasse.

– Det er søknader frå heile spekteret av interessentgrupper. Det er både utdanningsinstitusjonar som universitet, fylkeskommunar, museum, stiftingar og foreiningar, seier han.

– Det er veldig stor breidd, og det er positivt. Me trur også endå fleire vil søkja på dette i 2025, seier Eide.

Riksantikvaren samarbeider med sektorane for bygg og anlegg, utdanning og kultur om ein ny handverksstrategi. Kompetanseordninga til kyrkjebevaringsfondet er også eit viktig verkemiddel for å auka interessa blant handverkarar og rådgivarar for å ta på seg oppdrag med å setja i stand kulturminne.

Kyrkjebevaringsfondet starta opp i 2024, og fordelte nærare 100 millionar til 44 kyrkjer som ei start på tilskotsordninga.

Hausten 2025 kjem neste søknadsrunde. Regjeringa har tidlegare varsla ei gradvis opptrapping opp mot 500 millionar kroner i året til kyrkjebevaringsfondet.

Sjå bevaringsstrategien for kyrkjene her.

Kyrkjebevaringsfondet er eigd av Barne- og familiedepartementet, som har utnemnt eit programstyre med medlemmer frå Den norske kyrkja, Hovedorganisasjonen KA og Riksantikvaren.

Riksantikvaren leier sekretariatet for fondet og forvaltar ordninga.