Energisparing

Energieffektivisering – små tiltak kan gi stor effekt  

 Mange enkle og tradisjonelle tiltak har stor effekt for energiforbruket i eldre bygningar. Det er godt dokumentert at effekten gjeld for både klimagassreduksjon og økonomi. Samtidig er fleire av tiltaka enkle å gjennomføre, og det er mogleg å få til gode løysingar for både freda og verna bygg.  

Likevel: Gamle bygningar er bygde på ein annan måte enn vi byggjer på i dag. Derfor krev det også ein annan kompetanse for å gjennomføre energieffektiviseringstiltak på eldre bygg. Det er likevel mange tiltak som varetek kulturhistoriske verdiar og som kan gjennomførast utan at dei fører til skadar på bygningen. Kor omfattande tiltak som er mogleg og ønskjeleg vil variere avhengig av verneverdiar, bygningstype og -alder.    

Det er fleire gode grunnar enn økonomi for å bruke mindre energi   

Mellom 80 og 90 prosent av bygningane vi har i dag vil framleis eksistere og brukast i 2050.   

Betra energiyting i eksisterande bygningar gjer dei meir konkurransedyktige samanlikna med nybygg når det gjeld klimagassutslepp, kostnad i driftsfasen, komfort og inneklima. Energieffektivisering bidreg også til at frigjord energi i byggjesektoren kan brukast i andre sektorar og kan avgrense behovet for ny kraftproduksjon og inngrep i naturen.  

 Klimaendringane kan få store negative konsekvensar for samfunnet. Ved å bruke fornybare energikjelder og redusere energibruken i husa våre kan vi bidra til å redusere klimagassutsleppa.